BR LA UNION – Ikamkampaniya ti Department of Environment and Natural Resources (DENR) nga umarakop ti puon ti kayo kas paset ti ‘Tree Hugging Campaign’ kagiddan iti selebrasyon ita nga aldaw dagiti puso wenno Valentine’s day, February 14.
Segun iti ahensiya, rimuar iti panagadal a ti panangilatang ti oras kadagiti kayo ket makatulong a maipangato ti oxytocin levels, iti hormone a mangipaay ti kalmado ken emotional wellbeing.
Inlawlawag ti DENR Forest Management Bureau a ti panangarakop ti kayo ken panangilatang ti oras iti abay dagiti kayo ket mangibaba ti blood pressure ken heart rates, papigsaenna pay ti immunity ken ibaba na iti stress ken anxiety levels.
Segun pay iti DENR, saan a kasapolan nga agbalin a partikular nu anya a kayo iti arakopen agsipudta agpapada nga adda ipaayna a benepisyo nangruna iti salun-at.
Impaganetget pay ti ahensiya a ti napateg, dagiti kayo iti personal well-being ti tao ken pagtalinaedenna pay iti nasalun-at nga aglawlaw.
