Kinuwestiyon ni Senate Minority Leader Tito Sotto idiay plenaryo ti Senado idi kalman, aldaw ti Lunes, ti komposisyon dagiti miembro ti Commission on Appointments (CA) kalpasan nga inyanunsyo ni Senate Majority Leader Joel Villanueva dagiti sangapulo a majority members ti CA.
Dagitoy ket buklen da:
Sen Alan Cayetano
Sen Bato dela Rosa
Sen JV Ejercito
Sen Jinggoy Estrada
Sen Bong Go
Sen Rodante Marcoleta
Sen Imee Marcos
Sen Raffy Tulfo
Sen Joel Villanueva
Sen Mark Villar
Kuwestiyonable daitoy ni Sotto ken dinamag nu apay a ti mayorya ket nakagun-od ti sangapulo a puesto iti nabileg a komisyon.
Inlawlawag met ni Villanueva a ti nagbasaran ket ti 80-20 a representasyon manipud iti mayorya ken minorya.
Kayat a satwen ket 80% kadagiti 12 a miembro a katupag ti 9.6 nga nai-round off ket nagbalin a 10, bayat a ti 20% met ket 2.4 a nai-round off a nagbalin a 2.
Nupay kasta, binabalaw ni Sotto ti pinagbasaran iti porsyento, nalawag kunana iti desisyon ti Korte Suprema nga nu adda iti kontrobersiya iti komposisyon ti Commission on Appointments ket nasken a suroten ti Senado iti partylines ken party representation.
Innayon na nga awan dagiti “9.6, 9.5, 2.5 wenno 2.4.” nu di ket nalawag a nasken a maibasar iti partido.
Pangiyariganna ket nu innem iti miembro ti Nationalist People’s Coalition, tallo kadakuada ti agbalin a miembro ti CA.
Nu met lima iti naggapo iti Nacionalista Party, 2.5 ti rumbeng a representasyon, a mabalin nga agbalin a dua wenno tallo, depende iti mapagsaritaan dagiti partido.
PAra met iti Partido Demokratiko Pilipino (PDP) a tallo ti miembro na ti majority bloc, nasken a maaddaan da amin iti representasyon.
Laksid iti komprontasyon idiay plenaryo ket pinili met ti Senado nga ipaigid paylaeng iti diskusyon maipanggep ti agbalin a miembro ti komisyon.
