Sipapannakkel ni La Union 1st District Representative Francisco Paolo P. Ortega V kadagiti naaramidanna kabayatan ti maikadua a semester ti napalabas a tawen. Maibasar iti waragawag ti opisina ti kongresista, manipud Hulyo aginggat Disiembre 2023 ket nakaipaay daytoy iti tulong para iti edukasion ti 686 a benepisiario iti kolehio a katukad ti P5.8 millon kasta metten iti 4,000 a benepisiario iti sekondaria a katukad ti P12 million a gatad ti tulong. Babaen met iti pannakibinnadang ti opisina ni Congressman Ortega iti DSWD ket naipaayan iti medical assistance ti 1,392 nga indibidual a katukad ti P12.2 million a gatad ti tulong, burial assistance iti 596 a benepisiario a katukad ti nasurok P8 million nga assistance kasta metten a natulungan ti programa nga Assistance to Individual in Crisis Situation ti 15,750 a benepisiario a katukad ti P49.8 million a gatad ti tulong. Nakabinnadang pay ti opisina ti mammanday linteg ti Department of Agriculture ken natulungan ti 26,484 a mannalon, no sadino, naipaay ti P178.3 million a gatad ti tulong. Iti met programa a TUPAD, nagtinnulong ti opisina ni Congressman Ortega ken ti DOLE ken naipaayan iti sweldo ti 6,755 a TUPAD Workers, katukad daytoy ti P30.3 million nga assistance. Impanamnama ti kongresista a maituloy ti panagtrabahona iti napintas ita a tawen 2024 para iti pagsayaatan dagiti agindeg iti La Union, nangruna iti umuna a distrito.