LA UNION – Nasarakan laengen a natay ti maysa a 33-anyos a misis kalpasan a nagbekkel idiay ili ti San Juan, La Union.
Segun ken ni PSI Juanito Boaron Jr., hepe ti San Juan Police Station, naklaat laengen ti ama ti nasao a misis itay bigat idi nakitana daytoy a nakabitin iti siled ti balayda babaen ti nylon rope wenno tali.
Iti inisial nga imbestigasion dagiti otoridad, naamuan a nabayagen nga agparparikut ti misis gapu iti parikut a pinansial nangruna ti maipagarup nga utangna.
Kinapudnona, daytoyen ti maikapat a daras a ginandat ti misis ti agpakamatay.
Inulila ti misis dagiti annakna ken ti asawana a maysa nga overseas Filipino worker (OFW).
