BR LA UNION – Maipagarop a nagpakamatay ti maysa a massage therapist gaputi nadagsen a problema na.
Iti biktima a 29 anyos, baro, a tubo ti Porac, Pampanga ket maipagarop a nagbekkel iti uneg ti pagtrab-trabahuanna a massage spa idiay Barangay Taberna, Bauang, La Union.
Maibasar iti inisyal nga imbestigasyon dagiti kameng ti PNP Bauang, agarop alas 10:00 ti bigat idi naduktalan ti bagi ti biktima a nakabitin iti uneg ti massage spa.
Maibasar iti statement ti girlfriend ti biktima, a maysa nga Overseas Filipino Worker idiay Kuwait, kadagiti imbestigador ti Bauang Police Station, sakbay ti insidente ket timmawag ti biktima kenkuana agarop alas 2:00 ti parbangon babaen ti messenger.
Bayat iti panagsaritada, naibaga ti biktima iti girlfriend na a saannan a kabaelan ti bakbaklayen na a problema.
Kasaruno daytoy, nangala ti biktima ti tali ket ingalot na iti landok ti uneg ti spa ken inputipot iti tenngedna bayat ti video call dagiti dua.
Dagus a timmawag ti OFW kadagiti cabagyanna ditoy Pilipinas ngem saan a sumungsungbat dagitoy gaputa nakaturog da ken dis-oras pay laeng ti rabii.
Base iti salaysay ti OFW, adda iti impluwensiya ti arak ti nobyo na idi inaramid na ti insidente.
Naideklara a pimmusay ti biktima babaen ti medical personnel manipud Bauang Rural Health Unit nga indauluan ni Dr Erwil Nonan.
