LA UNION – Isagsagana itan ti pulisya ti kaskenan a kaso kontra iti maysa a mister a naka-shabu ken nanggandat a mang-hostage iti maysa a pamilia iti paraangan ti balay idiay Barangay Bagbag, ili ti Bauang, La Union idi rabii.
Nabigbig ti suspek a ni Vincent Bergado a taga-Binangonan, Rizal.
Iti pannakiuman ti Bombo Radyo ken ni C/Ins. Benjamin Diagan Jr., hepe ti Bauang Municipal Police Station, inlanadna a kellaat lattan a simrek ti nakamotorsiklo a suspek iti paraangan ti balay a kukua ti mannursuro a ni Belen Ramos.
Gapu ta adda ti imetna a patadem ni Bergado ket nabutngan dagiti lima a kabagian ni Ramos isu a simrekda laengen iti balay.
Ginandat met ti suspek ti sumurot kadakuada ngem napaay daytoy gapu ta nakabalunet ti ruangan.
Segun ken ni Diagan, ginandat pay ti suspek a makilaban kadagiti otoridad babaen ti natirad a kutsiliona a nakasiglot iti imana.
Naamuan pay nga awan iti limbong ti panunotna ti suspek gapu ta nagkiddaw pay iti danum ken sigarilio, kasta met a kayatna a makasarita ti naglibas nga asawana.
Kabayatanna, inaklon ti suspek a nagaramat pay daytoy iti droga sakbay a nagturong idiay ili ti Bauang tapno sapulenna ti asawana a nakawinnaswasna itay nabiit.
Inaklonna pay a naaramidna laeng ti mang-hostage gapu ta patienna a makatulong daytoy tapno agpakita kenkuana ti sapsapulenna nga asawa.
