Sagsaganaanen ti Metropolitan Manila Development Authority (MMDA) ti bilang dagiti deboto para iti masungad a Pista ng Poong Hesus Nazareno ita nga umay a Huebes.
Kinuna ni Edward Gonzales, MMDA Head of Road Emergency Group, a sangaribo a personnel ti intuding ti management da, pakairamanan dagiti para iti clearing operations kadagiti kalsada a dalyasatan ti Nazareno.
Dagitoy ket maiwaras manipud iti Quirino Grandstand, iti mismo a prosesion agingga a sumangpet ti Poon iti uneg ti Quiapo Church.
Inlawlawagna, agsina ti komite a dinutokan ti MMDA iti dayta nga aldaw tapno masigurado ti kinatalged dagiti deboto kasta met ti panagayus ti trapiko kadagiti kalsada ti Kamaynilaan.
Adda ti naituding para iti traffic enforcement ken uray kadagiti emerhensia a mabalin a tumaud iti mismo a traslacion nga isu ti talaga nga sinaganaan ti MMDA.
Manamnama a nangatngato ti bilang dagiti deboto a mapan ita nga aldaw mangrugi iti Martes nga isu ti Araw ng Pahalik agingga iti aktual nga aldaw ti Traslacion inton Huebes.
Kabayatanna, impalagip ni Gonzales kadagiti deboto a no mabalin dagiti addaan iti depekto wenno dagiti addaan iti annak ket agtalinaed lattan iti pagtaenganda para iti kinatalged bayat ti pannakipasetda iti piesta.
Iti laksid daytoy, dagiti first aid stations ket naibangonen ti ahensya para kadagiti matalimudaw, maipit iti traslacion ken dadduma pay nga emerhensia.
No maipapan kadagiti nagannak a di makaliklik iti panangitugot kadagiti babassit nga annakda, impalagip ni Gozales a nasayaat no ikabilda ti name plate ken contact details kadagitoy.
