Nakapanawen ti monster ship a China Coast Guard (CCG) 5901 manipud sadiay Bajo de Masinloc, ti traditional fishing ground asideg ti Zambales.
Pinasingkedan daitoy ni Philippine Coast Guard spokesperson for the West Philippine Sea Commodore Jay Tarriela idi kalman, Pebrero 14 kakadwa dagiti sumagmamano nga opisyales ti Philippine Navy ken National Security Council.
Segun kenni Commodore Tarriela, nakapanawen sadiay Bajo de Masinloc iti monster ship ken dinupag na iti agpa-Daya a direksyon nu sadino ket posible a sumaruno a turongen daitoy ket dagiti dadduma met nga exclusive economic zone ti Pilipinas.
Laksid ti panagpanaw ti monster ship, nagtalinaed met iti bisinidad ti Bajo de Masinloc dagiti dua pay a Chinese vessels.
Kabayatanna, ti maysa kadagiti kadakkelan a Chinese fisheries research vessel nga Lan Hai 101 ket nakapanawen ditoy pagilian ken adda itan iti distansiya nga 32.5 nautical miles manipud idiay Taiwan.
