Pimmusay ti maysa a motorcycle driver kalpasan iti napasamak nga aksidente ti lugan idiay Barangay Guinabang, Bacnotan, La Union idi malem kalman.
Nabigbig ti pimmusay a biktima a ni Michael Merido, 36 anyos, baro, construction worker ken residente ti Barangay Suyo, Luna, La Union.
Maibasar iti imbestigasyon ti Bacnotan Police Station, ni Merido a nakalugan iti motorsiklo na ket agturturong iti agpaamianan a direksyon.
Segun iti testigo a ni Jeremias Delfinado, napaspas iti taray ti motorsiklo agingga a nasakop na ti linya ti Elf Van nga minaneho ni Siveriano Herera, 50 anyos, addan asawa ken residente ti Caloocan City nga agturong met iti agpaabagatan.
Naamuan a timmama ti motorsiklo iti makinkanniged a paset ti Van ken nakaipurwakan ni Merido ken iti backride na a ni Marvin Barnachea, 34 anyos, baro, residente ti Barangay Rissing iti ili ti Luna a ti agdama ket awan iti puot na.
Nagpasar iti nakaro a pannakadundunor dagiti biktima a nakaiturongan dagitoy iti pagagasan idi a saan met nga naan-ano ti driver ti Van.
Naamuan nga awan iti suot a helmet dagiti biktima idi naaksidente dagitoy.
