Nagdinnungpar ti maysa a motorsiklo ken tricycle iti paset ti National Highway ti Brgy. Taboc iti ili ti San Juan.
Basar iti naisayangkat nga imbestigasion, nabigbig ti driver ti motorsiklo a Rusi 125 nga addaan ti plate no. 117 AUD a ni Jerico Murao y Maganese, agtawen ti 34, mekaniko ken residente ti Brgy. Barraca iti ili ti Bangar.
Idinto a nabigbig met ti nangiturong ti tricycle a Honda 125 a ni Erwin Cariaso y Matias, agtawen ti 23, awanan asawa, self-employed ken residente ti Brgy. Disso-or iti ili ti Bauang.
Iti inisyal nga imbestigasion dagiti otoridad, bayat a dumaldalyasat ti nangiturong ti motorsiklo nga agpaamianan ket dita a kellaat a maipagarup nga immagaw ti linya ti driver ti tricycle nga agturong met nga agpaabagatan.
Gapu iti daytoy, nagsagaba ti sugat dagiti maseknan a driver pakairamanan ti kinalubbon ti nakamotorsiklo a nabigbig a ni Alex Carbonelly Cesista, agtawen ti 22, awanan asawa, mekaniko ken residente ti Brgy. Marcos iti ili ti Rosario a dagus dagitoy a naitaray iti ITRMC ditoy Siudad ti San Fernando babaen kadagiti kameng ti Municipal Disaster Risk Reduction and Management Office iti ili ti San Juan.
Kabayatanna, saan met a nakapagsasarita dagiti agsinnungbangir a partido kalpasan a saan pay a nadeterminar ti balor ti pannakadadael dagiti sumagmamano a parte iti dua a lugan.
