LA UNION – Malamlamayanen ti maysa a mangngalap kalpasan a nalmes iti kabaybayan a sakop ti Barangay Wenceslao idiay ili ti Caba, La Union kabayatan ti pannakalagip ti Biernes Santo.
Nabigbig ti biktima a ni Reynante Marzan, 43, residente ti Bautista iti nasao nga ili.
Naamuan ti Bombo Radyo manipud iti Caba Municipal Police Station, a nabartek ti biktima a timmapog ken naglangoy iti baybay.
Nasarakan laengen dagiti residente ti mangngalap a tumtumpaw ken awananen iti biag.
Dagus daytoy a naitaray iti Caba District Hospital ti biktima ngem naideklara a pimmusayen idi nakagteng iti pagagasan.
