Kinumpirma ti Manila Police District (MPD) a nakaawat ti bomb threat ti headquarters ti Korte Suprema a masarakan idiay Padre Faura Street, Malate, Manila.
Segun iti MPD, dagus a nangisayangkatda iti inspeksion kalpasan a nakaawatda iti report maipapan iti mapapati nga eksplosibo, a negatibo met kamaudianan.
Mainaig iti daytoy, adu nga empleado ti Korte Suprema ti temporario a pimmanaw iti pasdek bayat a maisaysayangkat ti inspeksion ti bomb squad.
Gapu iti panagruar dagiti tattao manipud iti compound ti Korte Suprema, temporario a naserraan ti kalsada iti sango ti pasdek para iti trapiko.
Im-imbestigaranen dagiti otoridad ti nagtaudan ti nasao a bomb threat.
Iti daytoy napalabas nga aldaw, pinuntiria dagiti hacker ti website ti korte suprema, ngem dagus metlaeng a nakontrol ti maseknan iti account.
