Inwaragawag ni Senator Grace Poe kadagiti kompanya a mangilatag ti temporario a solusyon tapno makatulong kadagiti empleyado da a maliklikan ti nakaro a trapiko nga inggubuay ti panagrugrugi ti EDSA rehabilitation.
Segun kenni Poe, tapno matulongan dagiti commuters ket mabalin a mangitukon ti shuttle service dagiti kompanya ken iadaptar ti flexible working arrangements kas iti work from home (WFH).
Impunto ti Senadora a saan nga agbalin ti “business as usual” itan nangruna iti naaramid a JICA survey idi tawen 2017 ket nagkuna a dumanon ti agingga P3.5-B ti inaldaw a lugi ti ekonomiya ti Pilipinas ken mabalin pay a ngumato daitoy ti agingga P5.4-B inton tawen 2035.
Kayat ti mamanday linteg a mangiyuswat ti Department of Transportation (DOTr) ken Metro Manila Development Authority (MMDA) ti nalawa a public information campaign mainaig kadagiti addang nu kasta ket makissayan ti trapiko iti EDSA.
Kinunana a napateg a mailawlawag daitoy iti publiko, nangruna nu kasatno a kapaot a maipatungpal ti odd-even scheme, nu sino ti masakopan ken dagiti mailaksid iti daitoy.
