LA UNION – Kinemmeg iti pulisya ti maysa a mister a nagpabigbig kas retirado a heneral ken mangbutbuteng iti maysa a babai nga agtestigo pabor iti kaso ti anak daytoy a drug personality idiay Barangay Catbangen, syudad ti San Fernando, La Union.
Nabigbig ti suspek a ni Aladdin Cayago, 53, residente ti nasao a lugar.
Iti report a nakalap ti Bombo Radyo manipud iti San Fernando City Police, tiniliw iti police intelligence officer ti suspek gapu iti panagturong ti suspek iti pagtaengan ken panangbutbutengna iti maysa a 23-anyos na dalaga.
Maipagarup a nagpabigbig ni Cayago kas retirado a heneral ken pangpangtaanna ti biktima gapu iti panagkedked daytoy nga agtestigo iti korte a pabor iti anakna a ni Paul Cayago a sumangsango iti kaso a nga addaan iti pakainaigan ti illegal a droga.
Isagsagana metten ti pulisya ti kaso a grave coercion kontra iti suspek.
