Burburtsa kadagiti residente iti Sitio Tawi Tawi iti Brgy. Poro, San Fernando City, La Union iti nagapwan na ti fetus a nasarakan dagiti ubbing idi malem kalman iti igid iti baybay.
Iti pannakiuman iti Bombo Radyo La Union kenni Manang Nora, maysa kadagiti residente iti nadakamat a lugar ken isu ti nangipirmis ti fetus idi nairwaren idiay garapon, naladingitan daytoy ken saanna a maaklon iti nagbanagan iti fetus.
Nagboluntaryo ni Manang Nora a dalusan ti nakaikabilan iti fetus gapu iti asina kabayatan nga buybuyaen laengen dagiti tattao.
Segun kenkuan, aglutluto isuna idi nadamag na iti pannakasarak da iti fetus agingga nakita dagiti tattao iti lugar.
Gapu ta kadardarat iti fetus kinunana ket lininisan na daytoy babaen iti maysa a lupot ken binalkot na met laeng daytoy iti lupot tapno iturong iti natalged a lugar ken tapno saan a matudwan inggana a nagayab dan iti taga barangay ken iti city health office.
Konkondenaren na met dagiti residente iti nasao a ti napagteng iti fetus.
Maipalagip, maysa a fetus ti nasarakan dagiti ubbing iti nasao a lugar a mapatta-patta a 6-7 months old ken maysa a lalaki segun kenni Dr. Arman Carrera iti City Health Office.
Naitabon ti fetus iti Lingsat cemetery.
