Madama nga isaysayangkat dagiti girl scouts ti naduma-duma nga aktibidad para iti 47th Junior Provincial Camp a maang-angay idiay Blu Water Beach Resort and Parks idiay Barangay Pugo, ili ti Bauang, La Union.
Iti pannakiuman ti Bombo Radyo, agpada a kinuna dagiti camp directors nga isuda Jennifer Viloria ken Jephonie Paborada a panggep ti nasao a camping activity a maaddaan iti talek ti bagi ken makasursuro nga agbalin nga independent iti nasurok a 1,000 girl scouts no kaspangarigan temporaryo a maiyadayo dagitoy manipud kadagti bukodda a nagannak.
Dagiti girl scouts ket naggapu manipud kadagiti pagadalan ti elementarya iti intero a probinsya a La Union.
Naduma-duma a kita iti aktibidad ken programa iti naisagana para kadagiti girl scouts kas iti basic knot tying, sand castle making ken stone picking idiay igid ti baybay, panaglango iti swimming pool, obstacle course ken dadduma pay.
Namnamaen kinunada, a makatulong para iti masanguanan dagiti masursuro dagiti girl scouts kalpasan ti camping activity.
Kinuna pay dagiti camp directors a napintas ken maiparbeng ti nakaiyuswatan ti provincial camp gapu ta adda sadiay dagiti kasapulanda a pasilidad, nalawa ken segurado a natalged ti lugar para iti pangikabilan kadagiti tents.
Iti tema ti 47th Junior Provincial Camp ita a tawen ket “Unleashing Potencials, Igniting Change” a nangrugi manipud idi November 08 ken aglippas daytoy inton bigat, November 11, 2018.
