LA UNION – Agtaltalinaed pay laeng dagiti nasurok 115,000 a pamilya kadagiti evacuation centers iti walo a rehiyon kagiddan ti panagrugi nga agrekober ti pagilian manipud iti nagsasaruno ken napipigsa a bagyo a timmama ditoy pagilian.
Segun kenni Department of Social Welfare and Development (DSWD) Spokesperson Assistant Secretary Irene Dumlao, agtultuloy ti panangiruar ti gobyerno ti humanitarian assistance para kadagiti apektado a residente.
Inlanad ti opisyal, nakaibunong dan ti aganay 400,000 family food packs nga agbalor ti P125 million kadagiti lugar a dinalapos ti bagyo ‘Nika’, ‘Ofel’ ken ‘Pepito’.
Adda pay 1.3 million family food packs (FFPs) iti naka-preposition kadagiti warehouse.
Nagkari pay ti DSWD ti kanayunan a 45,000 FFPs para idiay probinsiya ti Catanduanes a nakaru a naapektaran ti bagyo ‘Pepito’.
