Sakbay pay iti panagdisu ti bagyo Gaemi idiay mainland China, inaramid ti gobierno ti China ti panagbakwit kadagiti komunidadna a mangngalap iti igid ti baybay.
Idiay Probinsia ti Fujian, agingga iti 150,000 a tattao ti naiyakar gapu iti panagbuteng iti layus ken nangato a panagayus ti danum.
Nasuspende metten iti tallo nga aldaw dagiti waterway iti dayta a lugar, kagiddan ti panagraira ti bagyo.
Malaksid iti daytoy, nakansela met ti sumagmamano a flights idiay Fujian ken Zhejiang Province bayat a nasuspende met ti serbisio ti tren iti lugar ti Guangzhou, nangruna dagiti ruta a lumasat kadagiti lugar a madangran ti bagyo.
Immuna nga insagana dagiti opisial ti China dagiti nadumaduma nga addang kontra iti napigsa a tudo ken layus, agraman ti panangpakdaar kadagiti umili.
Sakbay ti manamnama a panagsanglad ti bagyo idiay China, kimmapuy bassit daitoy tugot ti angin nga umabot iti 140 kph iti asideg ti sentrona idinto a dimmanon ti 215 kph ti kapegges ti bagyo, katupag pay laeng ti Hurricane 3 iti Estados Unidos.
Maipalagip nga iti panagpanaw iti bagyo a Gaemi (Carina) manipud iti teritorio a saklawen ti Pilipinas, addaan daytoy iti bileg ti angin a katupag ti Super bagyo.
Iti iseserrekna iti Taiwan, naan-anay a bimmassit ti pigsana gapu kadagiti panagharang ti dadakkel a bantay dayta nga estado.
