Nasurok 3,773 a pamilya wenno katupag ti 13,006 nga indibidwal iti apektado ti Bagyong Bising kadagiti lugar ditoy Ilocos Region, Cordillera Administrative Region, ken Cagayan Valley, segun kenni Office of the Civil Defense (OCD).
Kinuna ni OCD officer-in-charge Bernardo Rafaelito Alejandro IV, inisyal paylaeng a report daitoy ken mabalin pay a manayunan ti nasao a bilang, bayat nga agyamyaman met ti opisyal nga awan ti nailista da a nadangran wenno pimmusay iti panagduprak ti bagyo.
Impadamag ti ahensya nga adda pay ti namonitor a panaglayus sadiay Region I, II, CAR, ngem in-inut metlaeng a bimmaba ti danum. Malaksid ti panaglayus ket apektado pay dagiti lima a kalsada a nakaisayangkatan ti clearing operations kasaruno a saan a madalanan.
Nangibati met ti apagapaman a perdisyon kadagiti dadduma a kabalayan ti Bagyong Bising sakbay iti naan-anay a panagruar na ti Philippine Area of Responsibility (PAR) idi Biernes.
Segun iti Philippine Atmospheric, Geophysical and Astronomical Services Administration (PAGASA), posible manen iti panagserrek ditoy PAR ti bagyo ita a dominggo ti rabii wenno inton bigat ti Lunes sakbay nga agturong idiay China inton Martes.
