Nasurok 5,600 a Pilipino nga tripulante dagiti agtaltalinaed a stranded kadagiti ginasut a commercial ken cruise vessel idiay Persian Gulf ken Gulf of Oman gapo iti pannakatantan ti maritime traffic nga inggubuay ti pangta ti seguridad mainaig ti tension ti nagbaetan ti Estados Unidos, Israel, ken Iran idiay Strait of Hormuz.
Segun iti Department of Migrant Workers (DMW), karaman dagiti Pilipino kadagiti 20k nga international seafarers nga apektado dagiti operational restrictions.
Nabaelan metten ti ahensya a maka-repatriate ti nasurok-kumurang 1,100 a tripulante babaen ti koordinado nga operasyon, kadwa dagiti nasao a commercial ken cruise vessels.
Agtultuloy ti panagbantay ti DMW iti kasasaad dagiti barko tapno masiguro nga umdas ti suplay iti taraon, danum, agas, ken dadduma pay a kangrunaan a pagkasapulan.
Nabilinen dagiti licensed manning agencies para ti regular updates ken umdas a supply para kadagiti Pilipino a marino kabayatan ti kaadda da iti taaw.
Makikoordinaren ti pagilian kadagiti gangganaet a gobierno, shipowners, ken dadduma pay a stakeholders para ti posible a repatriation.
Nupay kasta ket adda latta dagiti dadduma a shipowners nga alanganin iti panangipalubos da kadagiti tripulante gapo iti amak a bumassit ti tao ti barko da a kasapulan para ti inaldaw nga operasyon.
