BR LA UNION – Mapatta-patta a nasurok 5,000 nga opisyal manipud iti pamilya politikal ti posible a maikkat iti puwesto apaman a maipasa ti gakat nga Anti-Political Dynasty bill idiay Kamara.
Daytoy ti imbutaktak ni Lanao del Sur Representative Zia Alonto Adiong.
Segun kenni Adiong, maibasar iti inisyal a panangadal ti Socioeconomic Research Bureau (SERB) ti House of Representatives usar ti datos manipud iti Commission on Elections aganay 9,852 manipud iti 17,983 a lokal a posisyon (54.8%) ti akin-iggem dagiti posible a miyembro ti political dynasties manipud iti mapatta-patta a 4,239 pamilya.
Inlawlawag ti mammanday linteg a ti bersyon ti gakat idiay House of Representatives ket maipawil iti aggi-giddan a panagtaray wenno panagtakem dagiti agkakabagyan agingga iti maikadwa a tukad ti relasyon.
Maibasar iti projection, nasurok a 5,000 elective positions iti mabalin a mabakante nu maipatungpal iti linteg, a manamnama a mangilukat ti ad-adu a gundaway para kadagiti baro a lider.
Natalantan idiay plenaryo ti Kamara iti House Bill No.8389 ita nga aldaw ti Miyerkules.
