Imbutaktak ni Department of Agriculture (DA) Sec. Francisco Laurel Jr. iti panakairaman dagiti nasurok 20 a private companies kadagiti serye ti rice smuggling ditoy Pilipinas.
Dagiti nasao a kompanya ket naamwan babaen ti nainget a kolaborasyon ti Department of Agriculture, Bureau of Customs (BOC), ken Philippine National Police (PNP). Natakwatan dagitoy kadagiti serye ti operasyon kadagiti nadumaduma a paset ti pagilian ken ado kadakuada ket naharang kadagiti puerto.
Iti agdama, innem a kompania ket napilaanen ti kaso.
Impaganetget ti sekretaryo a saan a nalaka iti panangipila ti kaso kadagiti dadakkel a kompanya, kangrunaan ta nalimitaran laeng iti DA iti food safety issues. Isutgapuna a nakikoordinar iti ahensya iti BOC para iti panangipila ti kanayunan a kaso kas iti smuggling – maysa kadagiti akem ti nasao nga opisina.
Kabayatanna, naamwan metten ti DA dagiti sumagmamano a customs broker a karaman iti panangipuslit dagiti agricultural products kangrunaan iti bagas.
Agdama metten a maisaysayangkat iti imbestigasyon kontra kadagiti brokers para iti naan-anay a panangipila ti kaso.
Maipalagip nga iti naangay a 4th State of the Nation Address (SONA) ni Presidente Ferdinand Marcos Jr. ket binallaagan na dagiti rice smugglers nga agtultuloy a mangsabsabotahe iti trade ken agriculture sector ti pagilian.
Segun iti Presidente, kamaten ti gobyerno dagiti smugglers tapno mapagsungbat iti ar-aramiden da a panaggundaway.###
