Nadadael ti nasurok P1.4-B a gatad dagiti agricultural products manipud probinsya ti Cagayan gapo kadagiti nagsasaruno a perdisyon ti dagiti napipigsa a bagyo.
Segun kenni Cagayan Governor Manuel Mamba, manamnama a ngumato pay ti nasao a perdisyon gapo iti naan-anay a panag-landfall ti supertyphoon Ofel ken iti bagyong Pepito.
Karaman kadagiti kangrunaan a naapektaran manipud iti perdisyon ket dagiti kapagayan, kamaisan, ken dadduma pay nga industriya.
Innayon met ni Governor Mamba nga agtultuloy ti maar-aramid nga assessment kadagiti perdisyon nga imbati dagiti nagsasaruno a bagyo ngem pinnarigat latta gapo iti awan sarday a panagtudo ken sumagmamano nga aldaw laeng a baetan dagiti panagduprak dagiti bagyo.
Maibasar iti record ti probinsya, manipud 70% agingga 80% a pakabuklan populasyon ti Cagayan ket mannalon ken mangngalap.
Ti Cagayan pay iti kagrunaan a pagtaudan ti bigas, mais, ken dadduma pay a nadumaduma nga high value commercial crops ditoy intero a pagilian.
