BR LA UNION – Arestado iti tallo a drug suspect ken pakabuklan a P27, 200 ti balor dagiti nakumpiskar nga iligal a droga manipud iti tallo a nagsina nga operasyon nga impatungpal dagiti otoridad idiay ili ti Luna, San Juan ken Tubao, La Union.
Idiay Luna, inarestar dagiti otoridad babaen ti search warrant iti maysa nga street level drug pusher, 37-anyos, idiay Barangay Victoria, Luna, La Union.
Nakumpiskar kenkuana iti maipagarop nga iligal a droga a mapatta-patta nga agbalor ti P13,600.
Idiay ili ti San Juan, inarestar dagiti kameng ti San Juan Police Station iti 25-anyos a lalaki idiay Barangay Ili Norte iti insayangkat a joint operation ti Provincial Drug Enforcement Unit ti La Union Police Provincial Office.
Kinumpiskar da ti maysa a gramo ti maatap a shabu, agbalor ti P6,800.
Bayat nga idiay ili ti Tubao, inarestar ti Tubao Police Station iti maysa a 40-anyos a lalaki, maysa nga aircon technician, idiay Barangay Gonzales, Tubao, La Union gaputi iligal a droga.
Nakumpiskar kenkuana iti maysa gramo ti maatap a shabu, agbalor ti P6,800 agraman iti sumagmamano a pidaso ti non-drug evidence.
Mainaig ti daytoy, pinadayawan ni Col. Bruno dagiti otoridad manipud iti tallo a nadakamat a police station iti naballaygi nga operasyon kas suporta iti agtultuloy a kampanya ti LUPPO kontra iligal a droga.
Dagiti nailiw suspek ket sumangsango ti kaso a panaglabsing iti Section 11 ken 12 iti Comprehensive Dangerous Drugs Act of 2002.
