Dumanon ti P274.926 billion iti pondo nga inlatang ti gobierno tapno mapondoan iti flood control projects ti gobyerno iti sidong ti 2026 National Expenditure Program (NEP).
Segun kenni Budget Secretary Amenah Pangandaman, iti nasao a pondo ket P272.33 billion iti agpaay iti Department of Public Works and Highways (DPWH) para iti Flood Management Program bayat nga iti nabatbati a P2.593 billion ket maipan iti Metro Manila Development Authority (MMDA) para iti Flood Control Program partikular iti operasyon ken panangtaripato kadagiti pumping stations idiay National Capital Region.
Iti nadakamat a proyekto ken budget ti MMDA ket inrekomenda dagiti dua nga ahensia nga addaan panggep a pasayaaten iti flood control idiay Metro Manila tapno napartak ti panagbaba ti layos.
Maibasar iti naisayangkat a budget call ket rumbeng nga addaan ti proper planning ken feasibility study iti DPWH ken MMDA, ken ammoen dagiti lugar a panangipanan dagiti proyekto.
Iti dasig ni House Committee on Appropriations Chairman Rep. Mikaela Suansing, sukimaten da iti budget deliberation dagiti flood control projects ken rumbeng a tunggal rehiyon ket adda ti maipakita na nga overall flood control mitigation plan ken masigurado nga existing iti proyekto.###
