LA UNION – Dimmanon itan ti full capacity ti emergency room ti National Kidney and Transplant Institute (NKTI) gapu iti kaadu dagiti pasyente nakaptan ti sakit a leptospirosis.
Malaksid iti emergency room iti nasao a pagagasan, napunno metten ti gymnasium a nagserbi a temporaryo a ward dagiti pasyente a nakaptan ti nasao a sakit.
Manipud iti 126 a pasyente nga adda iti ER ket 66 kadakuada ti naka-idda iti kama bayat a dagiti dadduma ket naka-wheelchair wenno iti monoblock a tugawan.
Kinuna ni NKTI’s Deputy Executive Director for Medical Services Romina Danguilan, awan ti problema nu agnayon da ti kama, ngem ti napateg ket manayunan iti tao a mangtaming kadagiti pasyente.
Nagpaulod metten ti Philippine Red Cross iti volunteers a tumulong kadagiti personnel ti NKTI.
Maipalagip nga immadu ti kaso ti leptospirosis idiay Metro Manila kalpasan iti nalawa a panaglayos gapwanan ti super typhoon Carina ken habagat.
