LA UNION – Inalerto ti National Telecommunications Commission (NTC) ti publiko maipapan kadagiti indibidual nga agpammarang a personnel wenno empleado ti NTC.
Inruar ti komision ti statement idi malem ti Huebes, Hunio 27 kalpasan a nakaawat iti report babaen ti Consumer Welfare and Protection Division.
Mapapati nga aw-awagan dagiti scammer dagiti biktima ken pangtaanda ida bayat nga agparang a nairaman ti numeroda kadagiti kaso ti scam.
Segun iti ahensia, gapu iti daytoy mapilitan dagiti biktima a mangted ti kuarta tapno maliklikan ti mapapati a kaso a kriminal ken tapno maikkat ti naganda iti mapapati a listaan dagiti scammers.
Kas sungbat kadagitoy a report, nainget a nagpalagip ti NTC iti publiko nga agridamda kontra iti daytoy a klase ti scam.
Kabayatanna, indagadag ti komision iti publiko nga ireport dagiti kastoy a scam iti NTC para iti kaskenan nga aksion.
