Impasiguro ti National Bureau of Investigation (NBI) a bantay-sarado ken nakakulong ita ti detention facility da sadiay Muntinlupa ni sigud a Congressman Arnolfo ‘Arnie’ Teves Jr.
Mainaig paylaeng daitoy ti saritaan ti seguridad ken panagbantay ti akusado a mainaig ti nadadagsen a kaso, partikular ti panagpatay wenno murder.
Pinasingkedan in National Bureau of Investigation Director Retired Judge Jaime B. Santiago a nainget da a banbantayan ti sigud a kongresista kabayatan ti kaadda na ti puder da para kadagiti saan a mapakpakadaan a mabalin a mapasamak.
Laksid ti strikto a panagbantay ket kinuna ti direktor a raemen da ti karbengan pantao ni Teves. Imbilin na kadagiti personnel ti ahensya nga annadan, salakniban, ken bantayan ti kongresista tapno saan a makapdas ti panagdangran ti uneg ti detention facility na.
Kabayatanna, gapo met iti impaulog a ‘commitment order’ ti Manila Regional Trial Court Branch 12 ket naiyakar manen ni Teves idiay Manila City Jail.
Segun iti abogado na a ni Atty. Ferdinand Topacio nga addaan da kadagiti ‘security concerns’ wenno pakaseknan ti seguridad ti biag isu ket kinontra da ti pannakaiyakar ti kustodiya na.
Nangipila met ti ‘motion for reconsideration’ sadiay korte ti kampo na tapno mapagtalinaed latta iti detention facility ti National Bureau of Investigation idiay Muntinlupa ni Teves.
Karaman kadagiti kaso ni Teves ket ti illegal possession of explosives, illegal possession of firearms, ken maitudtudo pay a mastermind para ti panagpapatay kenni sigud a Negros Oriental Governor Roel Degamo.
