Adda itan ti code white alert dagiti ospital idiay Metro Manila para iti tinawen a piesta ni Itim na Poong Hesus Nazareno inton sumaruno a Huebes, Enero 9.
Babaen ti Code white alert, nakasagana dagiti ospital a mangsungbat kadagiti emerhensia iti aniaman nga oras, partikular dagiti maseknan a personnel ti ospital kas kadagiti doktor, nurses, surgeons, ken dadduma pay.
Iti maysa a press conference, kinuna ti hepe ti DOH Health Emergency Management Bureau a ni Doctor Irvin Miranda a malaksid iti NCR, naikaikabil met iti Code White kadagiti ospital iti Central Luzon ken CALABARZON.
Adda pay 20 nga hospital health emergency response teams manipud kadagiti ospital ti DOH.
Tinawenen a paset dagiti medical team a maideploy gapu iti manamnama a minilion a deboto nga agdudupudop iti Quirino Grandstand ken Quiapo church para iti Traslacion.
