Maipasango iti baro a karit ni Israeli Prime Minister Benjamin Netanyahu kasaruno ti posible a pannakalukat ti negosasion iti nagbaetan ti Estados Unidos ken Iran, bayat nga agtultuloy iti tension ken gubat idiay Middle East.
Daytoy ket kalpasan nga inwaragawag ni U.S. President Donald Trump a silulukat ti America a makisarita iti Iran tapno mapababa ti tension, agraman iti isyu ti nuclear ken ballistic missile programs ti Tehran. Nupay kasta, pinaglibakan ti Iran iti nasao nga addang ket tinakderan a kasapulan ti kompensasion ken nalawag a garantia sakbayda a makinegosasyon.
Segun kadagiti analyst, adda iti sidong ti nakaro a pressure ni Netanyahu, a pagaammo a mangidurduron ti mas agresibo a kampania maibusor iti Iran.
Kenuna ni Michael Milstein, sigud nga opisial ti Israeli military intelligence, a mabalin a mapilitan ni Netanyahu nga umawat ti aniaman a negosasion no ituloy daytoy ti Estados Unidos.
Innayonna pay a kayat ni Netanyahu nga ituloy ti gubat ken tungpalen ti karina a parmeken dagiti pangta iti seguridad ti Israel, agraman ti posibilidad a panagbalbaliw ti rehimen idiay Iran. Nupay kasta, dumakdakkel ti nagbaetan dagiti panggepna ken ti agdama a sitwasyon iti ground.
Kabayatanna, agtultuloy a balansien ti Estados Unidos ti diplomasia ken military presence-na iti rehion, bayat nga agtalinaed a natibker ti agresibo a takder ti Israel.
Inpakaammo ni Israel Katz ti plano a mangipasdek ti nalawa a security zone iti abagatan a Lebanon agingga iti Litani River kas paset ti operasion maibusor iti Hezbollah, a makunkuna a suportardo ti Iran.###
