LA UNION – Iti laksid ti agtultuloy a panagtudtudo iti sumagmamano a paset ti pagilian, impanamnama ti National Food Authority (NFA) ti pannakaituloy ti panaggatangda iti bagas manipud kadagiti mannalon.
Kinuna ni NFA administrator Larry Lacson nga agtalinaed met ti nangato a presio a dati nga us-usaren ti NFA: P23 agingga iti P30 kada kilo para iti dry, ken P17 agingga iti P23 kada kilo para ti kaan-ani.
Segun iti opisyal, agtultuloy a mapaadu ti stock ti bagas kadagiti bodega da, kas panagsagana iti panawen ti kalamidad no sadino a nangato ti panagkasapulan kadagiti stock ti NFA Rice gapu ta mausar dagitoy iti relief operations.
Agingga idi agtapos ti Hunyo, nakagatang ti ahensia iti nasurok a 3.5 milion a sako a bagas, dandani dua gasut a ribu a nangatngato ngem iti target a 3.3 milion.
Iti agdama, kinunana, nainget ti koordinasion dagiti field office ti NFA kadagiti mannalon, kooperatiba dagiti mannalon, ken asosasion tapno agtultuloy ti panaggatang.
Segun ken ni Lacson, inaramid met daytoy ti ahensia tapno matulongan dagiti mannalon a makagun-od iti ekstra a pamastrekan.
