Kinumpirma ti National Grid Corporation of the Philippines (NGCP) ti pannakadadael ti 69-kilovolt line ti Lallo-Santa Ana iti probinsia ti Cagayan kalpasan a nagduprak ti bagyo Marce.
Immuna a nag-landfall ti bagyo iti probinsia a nangigubuay iti napigsa a tudo ken angin a nangdadael met iti sumagmamano a pagtaengan ken imprastruktura.
Basar iti datos ti NGCP, nairekord ti pannakadadael ti nasao a linia kalpasan ti alas 9:24 ti bigat idi kalman.
Kalpasan a naapektaran ti nadakamat a linya, impadamag ti NGCP a napukaw ti suplay ti koriente ti Cagayan II Electric Cooperative, Inc.
Kabayatanna, nangibaon met a dagos ti NGCP kadagiti personnel a mangtarimaan kadagiti nadadael a linya.
