Pormalen nga inlatag ti National Historical Commission of the Philippines dagiti aktibidad para ti umadani nga Araw ng Kalayaan inton Hunyo dose.
Iti naangay a press conference ti komisyon ket inlatag da dagiti maur-uray a programa a namaen iti publiko kadagiti sumaganad nga aldaw.
Nagduduma dagiti nakatuding a plano a dar-ayan dagiti Pilipino tapno ipakita ti panakipamaysa da iti nasao a selebrasyon.
Narugian daitoy babaen iti panagbigbig ken panangipaay pammadayaw iti bandera ti Pilipinas idi narambakan ti National Flag day.
Segun met kenni Eufemio Agabayani III manipud National Historical Commission of the Philippines, adu pay dagiti nakalinya nga aktibidad ti insagana ti komisyon.
Maysa ditoyen ti maangay a konsyerto sadiay Luneta Park, Maynila a maawagan kas Musikalayaan a sarunuen ti parada babaen ti panangidaulo dagiti bumbero a mangallukoy iti publiko a makipaset ti aktibidad.
Inton Hunyo 10 met ket adda iti maisayangkat a serbisyo-medikal a maawagan kas Klinakalayaan kasta met iti maisursor a Kadiwa ng Pangulo inton Hunyo 11.
Kabayatanna, adda met ti presentasyon manipud Armed Forces of the Philippines ken kadagiti dadduma pay a uniformed personnel tapno agserbi kas inspirasyon kadagiti mangayat nga agbalin a paset ti kasundaluhan ti Pilipinas.
Kamaudiananna ket ti maiusayangkat a simultaneous flag raising inton Hunyo 12 kagiddan ti parada ng Kalayaan. Para met iti rabii iti nasao nga aldaw ket maisayangkat ti maysa manen a konsyerto sadiay Luneta Park.
Nadakamat pay iti press conference iti kallabes a panaglayag sadiay West Philippine Sea ti Atin Ito coalition. Situtured nga intag-ay iti grupo ti bandera ti Pilipinas iti kabaybayan a pilit nga tagtagkuaen iti China.
Innayon ni Eufemio Agabayani III a saan da a lapdan ti siasinoman a mangitag-ay ti bandera nangruna nu maaramid met daitoy iti nasayaat ken sipupuso para iti panagayat ti pagilian.
