Pinaglayag manen ti North Korea ti 5K-ton-warship da, dua a lawas kalpasan a tummagilid gapo iti umuna a gandat da.
Maipalagip a ti insidente ket inawagan ni North Korean leader Kim Jong Un kas “criminal act” agsipud ta nangipaay daitoy iti pammabain iti pagilian da.
Segun iti state-run news agency, naisublin ti balanse ti barko ken agdaman a nakasanglad ti maysa a pier. Manamnama met a maisubli ti sigud a kondisyon nan kasaruno ti maangay a panagtataripnong ti ruling party ita a bulan.
Kabayatanna, gapo met iti nakaro a rurod ni Kim Jong Un ket naarestar dagiti uppat nga opisyales: karaman ni Ri Hyong-son, deputy director ti Munitions Industry Department. Ni Ri ket miembro pay ti Central Military Commission iti partido nga isu ti mangimatmaton ti Korean People’s Army.
Saan met a nalawag nu anya ti agbalin a dusa ti opisyal ngem pagaammo ti North Korea ti nadadagsen a sentensya kas iti forced labor ken bitay.
Makita iti satellite images ti mano-mano a proseso ti panagguyod kadagiti tali ken barrage balloons para ti panangpirmis iti barko.
Segun met kadagiti political analyst, seryoso ti rehimen ni Kim mainaig ti panangpapigsa ti militar da, partikular iti modernisasyon ti Korean Navy. Sumagmamano a lawas sakbay ti inidente ket nagpakita pay ti North Korea ti kapada a warship a naawagan kas “Kim”.
