Binigbig ti Nationalist People’s Coalition (NPC) ni Speaker Ferdinand Martin Romualdez gapu iti panangidaulona iti Kamara de Representantes tapno maitandudo dagiti baro a reporma ni Presidente Ferdinand Marcos Junior ken maipangato ti kasasaad ti panagbiag dagiti mannalon, masigurado ti umdas a suplay ti nalaka a taraon, ken ti pundasion para iti narang-ay ken inklusibo a Bagong Pilipinas.
Kinuna ni Quezon 1st District Representative Mark Enverga, chairman ti House Committee on Agriculture and Food ken pannakangiwat ti NPC, a ti panggep ken direksion ti liderato ni Speaker Romualdez ti nangpapigsa iti super majority ti Kamara ken nangited kadagiti linteg ni Presidente Marcos a mangtaming kadagiti kapatgan a kasapulan ti umili.
Impaganetgetna ti pannakaipasa ti Republic Act 12022 wenno ti Anti-Agricultural Economic Sabotage Act, a mangilaslasin kas economic sabotage dagiti agricultural smuggling, hoarding, profiteering, ken cartel operations nga addaan iti dusa a tungpal biag a pannakaibalud.
Intudo pay ni Enverga ti epekto ti RA 12078, a nangamyendar met iti Rice Tariffication Law tapno mapawaywayan ti Rice Competitiveness Enhancement Fund (RCEF) agingga iti 2031 ken maipangato iti P30 billion ti tinawen nga alokasyon a mangtulong kadagiti mannalon manipud iti P10 billion.
Ipaay ti linteg ti turay iti Department of Agriculture (DA) a mangangkat iti bigas no kasapulan, nangruna no agkurkurang ti suplay wenno adda panagngato ti presio ditoy pagilian.
Dinayaw pay ni Enverga ni Speaker Romualdez iti panangidaulona iti supermajority coalition ti Kamara, pakairamanan ti NPC, a nangipasa kadagiti 61 manipud 64 a priority bills nga inlasin ni Presidente Marcos ken ti Legislative-Executive Development Advisory Council (LEDAC).
Kasta met kunana ti panagregget ti lider ti Kamara tapno masigurado nga adda responsibilidad dagiti opisyal iti pannakaipatungpal dagiti programa ti agrikultura ken kagimongan.
Bayat nga umab-abante ti pagilian, kalikaguman ni Enverga ti agtultuloy a panagtitinnulong tapno mapagnumaran nga usto ti epekto dagitoy a reporma.
