Ur-urayen pay ti National Security Council (NSC) ti opisyal a waragwag ti Department of Foreign Affairs (DFA) mainaig kadagiti tallo a Pilipino nga inarestar ti China a pinabasol da a karaman iti espionage wenno panagespiya.
Kinuna ni NSC Spokesperson Jonathan Malaya nga iggem paylaeng ti gobierno ti Pilipinas ket dagiti sumagmamano nga impormasyon kas iti pannakaarestar dagiti Pilipino sadiay Hainan Islands ken dagiti nagnagan da, kas maibasar metten iti inruar ti state media ti China.
Imballaag ti opisyal nga aniaman nga impormasyon a rumrumuar manipud iti state media ti China ket kasapulan pay a maberipikar agsipud ta mabalin a propaganda laeng dagiti damag a panangdadael met iti Pilipinas.
Kabayatanna, makikooordinar metten ti konseho ti Department of Foreign Affairs tapno ammuen ti adda ti likudan daitoy a kaso ken tapno makaited da ti tulong kadagiti Pilipino nu agpayso man iti damag manipud iti manangallilaw a pagilian.
Am-ammuen payen ti opisyal nu adda ti impormasyon nga impadanon ti Chinese government ti Embahada ti Pilipinas a nakabase idiay China.
Malaksid iti daitoy ket makitintinnulong metten ti NSC iti Consul General ti Pilipinas a nakabase idiay Guangzhou – kaasitgen a konsulada idiay Hainan Islands a nakaarestaran dagiti Pilipino.
