Pinagtalikudan ni National Security Council (NSC) spokesperson Assistant Director General Jonathan Malaya ti alegasyon ti panagusar ti termino a ‘West Philippine Sea’ ket maibasar ti linteg ken saan a maysa laeng nga bunga ti imahinasyon.
Dinakamat ni Malaya ti baro a linteg ti pagilian a nabiit pay nga pinermaan ni Presidente Ferdinand Marcos Jr. idi Nobiyembre 8, 2024 – daitoy ket ti Republic Act 12064 wenno iti Philippine Maritime Zones Act a nalawag a nadakamat iti termino a West Philippine Sea.
Kinunana, ti maritime zones ti PH iti makin-Laud a paset ti archipelago pakairamanan ti Luzon Sea ken territorial sea ti Bajo de Masinloc ken maritime features ti Kalayaan Island Group ket kolektibo a mabigbigbig kas ‘West Philippine Sea’.
Inlawlawag ni Malaya iti “old reference” wenno daan a pakaibasaran nga administrative order a pinermaan met ni sigud Presidente Benigno Aquino III idi 2012 nga ususaren itan dagiti vlogger ken commentators kas basaran ti panangidepensa iti termino.
Nupay saanen a nanginagan ti opisyal iti topiko, maipalagip nga immunan a nadakamat daitoy ni Sagip party-list Representative Rodante Marcoleta iti maysa a panagdengngeg sadiay House of Representatives idi Pebrero 4.
Kinuna ni Representative Marcoleta nga awan iti West Philippine Sea iti mapa ti pagilian ken daitoy ket ara-aramid laeng.
