LA UNION – Posible a maidatag iti reklamo nga obstruction of justice kontra kenni sigud a President Rodrigo Duterte gaputi panangilemmeng iti lokasyon ni KOJC founder Apollo Quiboloy, laksid nga ammo daytoy ti sigud a presidente, segun iti maysa a mammanday linteg.
Naukag daytoy idi salodsoden ni House Deputy Minority leader France Castro ni Ako Bicol party-list Rep. Raul Angelo Bongalon a mangidep-depensa iti pondo ti Department of Justice iti plenary debate idiay Kamara para iti inton 2025, nu posible a liable ni Duterte iti sidong ti linteg, kalpasan nga imbaga ti sigud a presidente idi Hulyo nga ammo na nu sadino ti ayan ni Quiboloy ngem daytoy ket sekreto.
Sinalodsod ni Cong. Castro nu maikonsidera daytoy nga obstruction of justice.
Inlawlawag met ni Bongalon, nga adda naduma-duma nga elemento iti krimen.
Nu present amin nga elemento, kinuna na a siasinuman a posible nga offender ket mabalin a sumango iti kaso nga obstruction of justice.
Kinuna pay ni Cong. Bongalon a dagiti nagbalin a waragawag ti sigud a presidente, nangruna ket isuna ti administrator dagiti property ti KOJC, ket mabalin a paka-kaswanna ti obstruction of justice .
Immuna ti daytoy, sumagmamano a mammanday linteg a pakaibilangan ni Rep. Bongalon ket agpan-panawagan nga imbestigaran iti maipagarop a nagbalin a papel ti sigud a presidente ken cacabagyanna, iti panangilemmeng ti pastor nga iti dayta a panawen ket sap-sapolen dagiti otoridad tapno iserbi iti in-yisyu nga arrest warrant ti korte.
Iti biang ti kampo ni Duterte, immunan nga imbaga ni sigud a presidential legal counsel Salvador Panelo nga administrator laeng ni Duterte para iti KOJC properties, saan kenni Quiboloy.
Inlawlawag pay ni Panelo nga abogado ni Duterte ket ammo na a saan nga umno nga ilemmeng ti maysa a pugante.
