Pinainget pay ti Office of Civil Defense (OCD) ti koordinasyon da iti Department of the Interior and Local Government (DILG) ken kadagiti lokal a gobierno para ti panagsagana ti agtultuloy nga epekto ti Southwest Monsoon wenno Habagat ken pangta dagiti dakes a weather systems.
Karaman kadagiti addang ti activation dagiti Emergency Operations Centers, panagsagana kadagiti evacuation sites, rescue teams, ken panangpasiguro nga umdas iti supply.
Nabilin met dagiti lokal a gobierno a mangisayangkat ti pre-emptive evacuation kadagiti lugar a banbantayan ti Department of Environment and Natural Resources, Mines and Geosciences Bureau (DENR-MGB) a bulnerable iti layos ken panagreggaay ti daga.
Nainget pay iti koordinasyon ti OCD ken ti state weather bureau a DOST-PAGASA tapno dagos a maiwaras dagiti forecasts ken pammakdaar.
Kasaruno daitoy ket nagpanawagan manen ti OCD iti publiko nga isagana dagiti emergency go-bags da ammoen ti kaasitgan nga evacuation center, ken dagos nga agbakwit nangruna kadagiti agnanaed ti asideg ti kabaybayan ken nabababa a lugar.
