Agtultuloy ti pannakikoordinar ita ti liderato ti Office of Civil Defense- Western Visayas iti municipal government ti La Castellana, Negros Occidental.
Panggep daitoy nga addang ti madagdagos a pannakaresolbar dagiti saritaan mainaig kadagiti evacuation sites dagiti residente nga apektado ti panag-alburoto ti Bulkan Kanlaon.
Segun kenni OCD-Western Visayas Regional Director Raul Fernandez, kumkumbinsiren da itan ni La Castellana Mayor Rhummyla Nicor-Mangilimutan nga ikonsidera ti Himamaylan tent city.
Mamati ti ahensya a mabalin a mausar daitoy kas temporario a pagnaedan dagiti evacuees manipud iti didigra.
Maibasar iti datos, dumanon met ti walo a barangay ti sumangsango ita ti pangta gapo iti bulkan.
Segun kenni Fernandez, mabalin a mausar paylaeng ti Himamaylan tent city bayat a madama ti panangilatag ti munisipyo ti long-term plan da para ti permanente nga evacuation centers iti lugar.
Kinunana nga awan pay ti pinermaan ti La Castellana LGU a memorandum of agreement kakadwa dagiti dadduma pay nga apektado a lokal nga gobierno.
