BR LA UNION – Umaboten iti 23 ti bilang dagiti natay gapu iti epekto ti Southwest Monsoon (Habagat) ken dagiti kallabes a bagyo a Luis ken Maymay, segun iti Office of Civil Defense (OCD).
Maibasar iti kauddian a datos ti ahensiya, 15 kadagiti natay ket manipud Benguet, tallo idiay Rizal ken tallo met idiay Batangas bayat a maysa ti natay idiay probinsiya ti Quezon.
Dagiti naipadamag a nakaigapwan ti pannakatay dagiti biktima ket landslide, pannakalmes, panagreggaay ti bato, natupakan ti kayo, ken pannakakuryente.
Kabayatanna, 17 dagiti nasugatan idiay Ilocos Sur, Benguet, Abra, Rizal, ken Cavite. Tallo pay ti agtaltalinaed a mapukpukaw, nga agpapada a taga-Batangas.
Segun iti OCD, apektado kadagiti weather disturbance iti dakkel a paset ti Luzon, Visayas, ken Mindanao.
Iti pakabuklan, 1,410,800 a pamilya wenno nasurok a 4.9 milyon nga indibiduwal ti naapektaran iti Southwest Monsoon ken dua a tropikal a bagyo.
Kabayatanna, 9,101 a pamilya wenno 31,456 a tattao ti temporaryo nga agnanaed iti 407 nga evacuation centers.
Umabot metten iti 1,845 a babbalay ti nadadael, agraman ti 178 a naan-anay a nadadael.
Nasurok a P689.6 milyon ti mapattapatta a perdisyon iti sektor ti agrikultura.
Segun iti PAGASA, agtultuloy ti epekto ti Southwest Monsoon iti Luzon ken iti laud a paset ti Visayas, a mangigubway iti mawaras-waras a panagtudo ken panaggurruod iti sumagmamano a lugar.
