Gudua ti opinyon ti Office of the Legislative Department ti ili a Luna, La Union mainaeg iti pannakaikkat ti Bar ken Licensure Examination.
Iti pannakiuman ti Bombo Radyo kenni Luna La Union Vice Mayor Oscar Reyes, kinuna na a nasayaat man agsipudta mapalag-anan dagiti estudyante ken nagannak ngem saan met a maiyannatop agsipudta kasapolan daytoy iti maysa a propesyon.
Segun kenni Reyes, mangipasimudaag pay daytoy ti panagbaba ti kalidad ti edukasyon ken trabaho nangruna iti panagturong dagitoy iti ballaasiw taaw.
Dakkel met kuna ti pannakaapektar daytoy kadagiti dadduma a propesyon nangruna kadagiti immuna a nangala ti eksaminasyon agsipudta isuda ket dimmalan iti rigat idinto no mapatuloy daytoy ket nalaklaka para kadagiti naud-udi.
Impaganetget daytoy a no ti maysa a propesyon ket awan ti lisensya na ket mabalin nga adda dagiti negatibo a maited.
Iti sabali a bangir, adda ti makitkitana a pagsayaatan iti pannakaipalubos kadagiti ubbing 5 agpangato ti edad na tapno maipaayan met dagitoy iti wayawaya.
Nupay kasta, kasapolan latta ti panangsurot iti minimum healh protocols kas maiyannurot iti allagaden nga impatungpal ti Inter Agency Task Force (IATF).
Innayon na pay a kasapolan iti nairot a panangtungpal kadagiti annuroten agsipudta agingga ti agdama ket adda pay laeng iti pandemya ti pagilian.
Kabayatan na, nairot iti panangipatungpalda ti monitoring iti nasao nga ili nanguruna kadagiti boarder checkpoint tapno maliklikkan iti panagsaknap ti deadly virus.
Saan na met nga inlibak nga adda dagiti nailista a kaso ti Covid 19 sadiay ngem impasigurado na nga adda iti naan-anay a pannarabay kadagitoy ken makontrol iti panagwaras ti deadly virus.
