LA UNION – Imbilin ti liderato ti Securities and Exchange Commission ti dagus a pannakasuspende ti operasion ti sumagmamano a finance ken lending firms iti pagilian.
Segun iti nasao nga ahensia, daytoy ket kalpasan a saan da a nangisubmitir kadagiti katupag a kasapulan a maitunos iti Financial Consumer Products and Services Consumer Protection Act.
Binigbig ti Securities and Exchange Commission dagiti kompania a kas 9F Lending Philippines Incorporated, E-lending Incorporated, Hovono Lending Corporation, Makati Loan, Incorporated.; Second Pay Financing Incorporated; ken Tekwang Lending Corporation a karaman kadagiti naisample ken naipabaklay iti cease and desist order.
Impaganetget ti nadakamat a regulatory body a saan a nagtungpal dagiti nadakamat a kompania kadagiti pagannurotan a naibaga iti Memorandum Circular and Orders kasta met iti Impact Evaluation report.
Saan pay a nagtungpal iti umno a pannakagun-od ti opisial nga e-mail ken contact number, pannakaipalgak dagiti anunsio ken dadduma pay a panaglabsing.
Mainaig iti daytoy, binilin pay ti Securities and Exchange Commission dagiti akinkukua, operator ken empleyado dagiti kasta a financing ken lending companies a saanda nga ituloyen ti negosioda.
