LA UNION – Posible nga i-defer wenno maitantan iti budget deliberations iti plenaryo ti Office of the President (OVP) ita nga aldaw gapu iti saan a panagdar-ay ni Vice President Sara Duterte idiay Kamara.
Alas-10:00 itay agsapa a nakatuding koma ti budget deliberations ti OVP iti plenaryo, ngem agingga ita ket awan ti napasangpet da a Bise Presidente.
Segun kenni Minority Leader ken 4Ps Partylist Representative Marcelino Libanan, napateg ti presensiya ni VP iti plenary budget deliberations gaputa napateg nga aspeto daytoy iti linteg ti pagilian.
Impaganetget ni Libanan a rumbeng nga ikkan prayoridad ti bise presidente iti budget deliberations.
Inwaragawag ti minority leader a nu saan a talaga nga agparang ni VP Sara, posible nga itantan da daytoy agingga Miyerkules, September 25, nga isuti maudi nga aldaw ti plenary budget debates.
Ket nu saan latta nga agparang inton Miyerkules iti maudi nga aldaw ti budget deliberations, desisyunanen daytoy ti majority.
Iti committee report ti Appropriations panel, nakissayan iti pondo ti OVP ti aganay P1.3 billion idinto a ti nabati a pondo ket aganay P733 million.
Iti surat ni VP Sara kenni Lanao del Sur Rep Zia Alonto Adiong a nang-isponsor iti budget ti OVP iti plenaryo, nailanad a maitalek kenni Speaker Martin Romualdez ken Rep. Zaldy Co ti budget ti opisina na.
Kabayatanna, nakiddawan ti komento ni Libanan seknan iti nagwaras a ladawan ni VP Sara iti maysa a beach resort idiay Calaguas, Camarines Norte.
Segun kenni Libanan, awan ti dakes na ti panagturong iti beach ngem nasken koma a panunuten ken ipangruna ti panagdar-ay iti budget deliberations.
