Awan iti naisubmitir a listaan ti confidential activities ni Bise Presidente Sara Duterte a kas basaran iti nakausaran ti P112.5M confidential funds ti Department of Education (DepEd) idi tawen 2023.
Iti maika-12 nga aldaw ti impeachment trial ket naitultuloy ti direct examination kenni Commission on Audit (COA) Auditor Roderick Wamil, nu sadinno ket natingiting ti disbursement iti tig-P37.5M a confidential funds ti DepEd iti umuna, maikadua, ken maikatlo a quarter ti nasao a tawen.
Naipasango iti panagusig ti tallo a physical ken financial plan ti DepEd a pirmado ni Duterte idi isuna ket Sekretarya paylaeng iti ahensya.
Segun kenni Wamil, awan iti nakalanad a listaan dagiti confidential activities a pagbasaran iti panagusar iti panagusar kadagiti pondo.
Karaman kadagiti dokumento nga awanan ti detalyado a breakdown ti nakaigastaran para ti confidential funds ket dagiti:
Counter-insurgency programs – P9.2 milyon
Anti-illegal activities operations – P9.140 milyon
Anti-extremism/terrorism programs – P9.035 milyon
Naammoan pay a ni Bise Presidente Sara Duterte iti nangpirma kadagiti disbursement vouchers ti cash advances para ti confidential funds dagiti tallo a quarters.
Kabayatanna, naipresentar met dagiti tallo a liquidation report ti Office of the Vice President.
Maibasar ti COA, saan a nagisubmitir ti OVP iti documentary evidence para kadagiti bayad ti third quarter liquidation, a segun iti komisyon ket panaglabsing iti Joint Circular No. 2015-01.
