Agtultuloy iti kampanya dagiti otoridad kontra iligal a droga.

Segun kenni PDEA Region 1 Regional Director Joel B. Plaza, dumanon iti agarup 10,500 a piraso ti marijuana seedlings ken 8,500 a piraso ti fully grown marijuana plants ti naparot manipud iti uppat a plantasyon nga addaan iti pakabuklan a land area a 1,950 metro kuadrado, idi Nobyembre 7, agdama a tawen.

Daytoy ket mapatta-patta nga aggatad amin ti P2.1-Million.

Immunan a naipadamag a pinarot ken inuram iti nagtipon a puersa dagiti otoridad dagiti marijuana kabayatan ti eradication operation idiay Sitio Nakawa, Barangay Lon-oy, San Gabriel, La Union .

Dinadael ken inuram dagiti otoridad dagiti marijuana iti mismo a lugar ti nadiskubre a plantasyon.

Nupay nakalibas iti nasao nga operasyon iti saan a nainaganan a marijuana cultivator, maipagarop a naidatagan ti kaso a panaglabsing iti Republic Act 9165 wenno Comprehensive Dangerous Drugs Acts of 2002.

Iti naisayangkat nga operasyon ket nagbinnuligan ti PDEA Regional Office I (PDEA RO I), La Union Police Provincial Office-Provincial Drug Enforcement Unit (LUPPO-PDEU), LUPPO-Provincial Intelligence Unit (ISPPO-PIU), 1st La Union Provincial Mobile Force Company (1st LUPMFC), ken San Gabriel Police Station ken adda pay iti pannakabagi manipud iti lokal a gobyerno.

Kabayatanna, umabot met ti P837,420 a balor iti maatap a methamphetamine wenno maaw-awagan a shabu, iti kinumpiskar dagiti otoridad idiay ili ti Bugallon, Pangasinan idi rabii ti Miyerkoles.

Maibasar iti report manipud Bugallon Police Station, mapatta-patta nga agdagsen iti nakumpiskar a shabu ti 123.15 grams, manipud iti suspek a managan Ken Mark Prado Bustillos, 31-anyos.

Naarestar daytoy babaen iti bileg ti search warrant nga inyisyu ti korte para iti panang-sukimat dagiti otoridad iti pagtaengan na idiay Barangay Umanday.

Iti suspek ket maibilbilang nga street pusher ken maipagarop nga agsup-supply ti illegal drugs iti dadduma pay a paset ti probinsiya, ken agtataud dagiti iligal a droga idiay National Capital Region.

Malaksid iti illegal drugs, nakakumpiskar pay dagiti otoridad ti sumagmamano a live ammunition.

Iti suspek ket naidataganen ti kaso a panaglabsing ti RA 9162 ken Illegal Possession Of Firearms And Ammunitions wenno RA 10591