Insingasing ni Batangas Representative Leandro Legarda Leviste a makissayan ti P250-B a pondo para kadagiti flood control projects inton tawen 2026 ken iyakar ti saan a bumaba ti P200-B para ti edukasyon ken panagkissay ti budget deficit.
Impaganetget ti kongresista a nasaysayaat nga unaen ti panangpapigsa ti edukasyon ken panangibaba ti fiscal deficit iti tallo a porsyento sakbay a dakamaten ti panangpababa ti buis.
Nababalaw manen iti flood control projects kalpasan a malayos ti nalawa a paset ti pagilian gapo kadagiti panagtudo nga inggubuay ti Bagyong Carina ken Southwest Monsoon wenno Habagat laksid ti nasurok 5,500 a proyekto nga impannakkel ni Presidente Ferdinand Marcos Junior idi napalabas a tawen.
Manipud ti maikauppat a State of the Nation Address ti Presidente, inyunay-unay na dagiti alegasyon ti korapsyon ken saan nga umiso a panangusar ti pondo ken binilin na ti DPWH a mangisubmitir ti listaan dagiti proyekto nu kasta ket maimbestigaran a nalaing.
Kabayatanna, imbatad met ni Budget Secretary Amenah Pangandaman a silulukat ti ahensya da iti singasing a realignment ken nakasalalay iti desisyon ti Kongreso. Kinunana, maipada daitoy iti tema ti 2026 national budget a mangitukon ti dakkel nga alokasyon para ti edukasyon.
