Kinalampag ti grupo dagiti nurse iti South Gate ti House of Representatives gapo iti nasaknak a korapsyon iti gobierno idinto nga arig na maliplipatan dagiti nakatugaw iti puesta ti miserable a kondisyon dagiti Nurses ditoy Pilipinas.
Segun kenni Alliance of Health Workers (AHW) officer Edwin Pacheco, iti ₱6.79-trillion national budget para ti tawen 2026 ket blueprint laeng ti “plunder” ken “neglect.” Ipanpanawagan da a maipangato iti sueldo dagiti Nurses nga iti agdama ket ₱695 laeng ti tunggal aldaw.
Panggep ti grupo a maaddaan da iti ₱50K monthly starting salary para kadagiti amin a Nurse. Karaman pay ti panawagan ket ti panagibusen ti kontraktuwalisasyon ken mangipaay ti gobierno iti regular ken sigurado nga estado ti panggedan para iti sektor da.
Ipukpukkaw da nga maisubli dagiti natakaw a pondo ti Pilipinas a naiturong laeng ti kaadwan kadagiti kontrobersyal a flood control projects ken innayon da nga idirekta laengen dagitoy ti health care ken social services.
