LA UNION – Nakaawat dagiti kameng ti City of San Fernando Police Station ti awag manipud Poro Point Management a masarakan idiay Barangay Poro seknan iti kaso ti panagtakaw.
Idi nakaresponde da iti insidente ket in-turnover kadakuada dagiti guwardiya ti lugar dagiti suspek nga isuda Sanny Mislang Castro, 21-anyos, ken ni Eleseo Alcantara Natividad, 38-anyos. Dagiti dua ket agpada nga addaan asawa ken agtrabtrabaho kas pintor manipud Barangay Station District, Rosales, Pangasinan.
Narekobre kadakuada dagiti dua a pidaso ti transformer cores ken 350 MCM power cables nga addaan ti copper conductor a tinakaw da manipud iti underground tunnel nga agturong iti uneg ti kampo ti Philippine Airforce ken Voice of America Substation. Dagiti napapateg a linya ti komunikasyon ket mapatta-patta nga aggatad ti P500K.
Sakbay iti aldaw ti pannakakemmeg kadakuada ket nakadlawen dagiti guardiya ti lugar gapo kadagiti nakita da a naputed a wires kabayatan ti panag-roving da idi Setyembre dos ken idi Setyembre kwatro ket nakita da mismo dagiti suspek iti akto a panagputed kadagiti power cables.
Malaksid kadagiti tinakaw da ket narekobre pay ti inusar da iti krimen a maysa a Metal Saw, martilyo, ken dua pidaso a cutter knives.
UPDATE: Tirador ti cable wire manipud P500K a gatad ti cable wires, gistayan a natakaw idiay Poro Point, Ciudad ti San Fernando
Agarop alas-8:07 ti rabii idi aldaw metlaeng iti Huebes, Setyembre kwatro ket impadanonen dagiti otoridad ti kaso a Theft idiay Office of the City Prosecutor nga inawat met ti Duty Inquest Prosecutor a ni Honorable Graciela Leygo seknan paylaeng kadagiti suspek nga isuda Sanny Mislang Castro ken ni Eleseo Alcantara Natividad para iti inquest proceedings.
Inasistaran isuda ni Attorney Romualdo B. Obar manipud Public Attorney’ Office a pinili nga usaren ti karbengan da iti sidong ti Article 125 iti Revised Penal Code nu sadino, dagiti suspek ket naikkan ti lima nga aldaw a pawayway para ti panangisubmitir da iti counter-affidavit ken supporting evidences tapno kontraen ti akusasyon kenkuada.
Dagiti akusado ket agtaltalinaed iti kustodiya ti City of San Fernando Police Station para iti maur-uray a resulta ti preliminary investigation kasta met dagiti nakumpiskar a power cables.
