BR LA UNION – Inaprubaran ti House of Representatives iti maikatlo ken maudi a panagbasa iti gakat a P6.79-trillion 2026 national budget (House Bill 4058) idi Lunes, Oktubre 13.
Nakagun-od daytoy ti 287 votes a pabor, 12 a kontra, ken 2 abstention kalpasan iti deliberasyon sipud idi Agosto 18.
Segun kenni House Speaker Faustino “Bojie” Dy III, iti panangipasa ti budget ket pammaneknek a nakatutok ti Kongreso iti reporma ken obligasyon.
Prayoridad iti budget ti edukasyon, salun-at, agrikultura, ken serbisyo pang-komunidad maiyannurot iti adbokasiya ni President Ferdinand Marcos Jr.
Panawagan ni Speaker Dy, nasken a siguradwen dagiti mammanday linteg iti napudno ken naurnos a panangusar ti pondo ti gobyerno.
Malaksid iti national budget, inaprubaran pay ti Kamara ti sumagmamano a napapateg a gakat kas ti HB 4746 (Franchise para iti Bohol Light Company, Inc.) ; HB 4757 (Sustainable Cities and Communities Act); HB 4745 (Last Mile Schools Act; HB 4744 (Private Basic Education Vouchers Assistance Act).
Agsubli ti sesyon ti Kamara inton Nobyembre 10, 2025, alas 3:00 ti malem.
Kabayatanna, siniguro ni House Appropriations Chair Rep. Mikaela Suansing, a ti 2026 national budget ket sungbat iti pudno a pagkasapolan dagiti umili a Pilipino.
P1.28 trilyon – mailatang para iti edukasyon – kadakkelan iti pakasaritaan, limbes iti 4% global benchmark. Kabilang ditoy iti pondo para iti libre a kolehiyo iti sidong ti Universal Access to Quality Tertiary Education Act.
P411.2 bilyon para iti salun-at, kabilang iti P113-B para iti PhilHealth ken P49-B iti zero-balance billing program para kadagiti nakurapay.
P292.9 bilyon para iti agrikultura, kabilang iti P10-B ayuda para kadagiti mannalon ken mangngalap, P74.5B para iti farm-to-market roads ken irigasyon, ken P30-B para iti makinarya.
Iti kanayunan a pondo ket manipud iti naikkat a P255B flood control projects. Segun kenni Suansing, awanen ti infrastructure projects a mabalin a maponduan manipud iti unprogrammed appropriations malaksid laengen nu adda kanayunan a mapastrekan ti gobyerno.
Inpalagip na pay a saan a paset iti national budget ti unprogrammed appropriations ken saan daytoy nga awtomatiko a mapondoan.
Segun ken ni Suansing, nagbalin a transparent ken napudno iti nasurot a proseso iti panangtalantan ti budget babaen ti panangikkat iti small committee, pannaki-koordinar iti civil society group, ken panangsurot iti constitutional process iti panag-amyenda sakbay iti maikadwa a panagbasa.
